الحظ أعمى
واقف على الناصية وبيبيع ورق يانصيب
وبيوزع على الناس الحظوظ وهو مالهوش نصيب
ياللي بتعتمد ع الحظ وقت الحاجة وفي الوقت العصيب
الحظ غادر وطايش .. ونادر لما سهمه يصيب
إعرف نفسك
أنا اللي بعضي من تراب الأرض وبعضي من أثير
انا الظلام والنور... وجوايا الصغير والكبير
انا اللي ممكن ازحف على بطني وممكن في الهوا اطير
انا الشر لو أطاوع نفسي وكل الخير لو يصحى الضمير
الكون العجيب
الدنيا كورة مدورة ..
بريشة فنان متصورة
ساعة مضلمة .. وساعة منورة
طول عمرها بتمشي لقدام ...
ومش ممكن ترجع ورا ... !
من التراب للتراب
نصيحتي يابني .. لا تجري .. ولا تمشي على مهلك
وأضحك قوي للدنيا .. عشان الدنيا تضحك لك
وإبعد عن رفاق السوء , حتى لو كانوا من أهلك
ولو صابك في يوم الغرور .. إفتكر إن التراب أصلك
ارجو أن تكون هذه المجموعه قد نالت اعجبابكم
شكرا لكم
ليست هناك تعليقات:
إرسال تعليق
شكرا لكل من ترك تعليقا